每日一『事』

9月21日

fit_1109 — Thu, 20 Sep 2007 01:54:16 +0800

9月21日 - 新的工作、新的開始

給二舅父的信

fit_1109 — Sat, 07 Jul 2007 14:47:24 +0800

HI 二舅父,

計一計，你都走咗兩個月啦，你嗰邊好嗎? 見唔見到外公呀? 如果見到外公，記住代我地好好照顧佢呀!

我地呢邊…除咗婆婆太掛念你，攪到胃口唔好之外，大家一切都很安心。婆婆最近瘦咗好多呀!!! 我平時見佢就冇乜野，不過聽大舅父講，每當佢下午一個人在家的時候，佢就呆呆的躲在睡房。我相信佢只係太掛住你啫，唔係咩大病… 我會幫你氹下佢食返多d野架啦….你放心啦!我地而家久不久都會打去泰國，搵你老婆同你兩個女傾下計，訓練一下佢地的廣東話。佢地都好叻呀! 尤其是細女阿安…佢終於夠膽同我地講廣東話啦… 冇計啦, 鬼叫佢冇咗你做翻譯咩! 哈哈!!! 而你的大女阿茵，上個月尾同佢的同事去咗幾日旅行，影咗好多靚相俾我睇… 我見佢玩得好開心，我估佢心情已經平復咗啦… 你唔洗擔心。而二舅母方面，佢真係好叻呀! 佢而家全面代替了你的工作崗位，一個人打理晒成個工場。雖然係好辛苦，不過佢沒有怨言，好努力的去做。原來平時貪玩的二舅母，做起正經事的時候會變成一個強人架。勁!!! 至於債務上的問題，阿媽、大舅父、婆婆都會遂步遂步去解決… 現時泰國佢地日常的生活完全沒有大問題，如果阿安出年入大學的話，我地一定會負責佢的學費. 你可以放心，我地會好好的照顧佢地架啦…!!!

其實我打算等婆婆精神好d的時候，帶佢去泰國走一趟，等佢見下兩個孫女，等佢安心d，你贊成嗎?

二舅父，阿安話我知道，你曾經返去探佢地呀! 係唔係真架? 其實我都好掛住你呀，不如我約你今晚在夢中一齊食宵夜呀! 我等你呀~

兒甥女卓慧上

悲傷的旅程

fit_1109 — Thu, 10 May 2007 12:45:39 +0800

兩日前我哋全家決定今個星期六會起程去泰國幾日。
本來「泰國」是一個充滿陽光海灘、輕鬆、歡笑、活力的地方。可惜我面前的「泰國」卻充滿眼淚、傷感，一切都是愁雲慘霧...

再見了...拍檔!

fit_1109 — Fri, 04 May 2007 11:18:07 +0800

My Dearest Parnter,

跟你認識咗2年，大家一直合作無間。如今你要走啦... 我真係好唔捨得....!!!

雖然已經有另一位朋友會接手你的工作，但始終仲未同佢配合到...今朝就因為聽唔到你把聲，攪到我唔知醒起身要"乍"病攞sick leave啦... 可知你對我有幾咁重要呀...!!!

朋友，你要好好保重呀! 我會同新好好的溝通溝通，好讓佢可以盡快補上你的位置。我會好好的生活下去，你不用掛心啦... !!! 後會有期...珍重。

你的好拍檔 Fit Fit

p.s. 呢個就係你的接班人啦，雖然佢比你靚仔，不過我最愛的...依然是你!!!

(閱讀全文)

從前的我

fit_1109 — Fri, 06 Apr 2007 18:25:49 +0800

究竟當年我阿媽生咗個仔? 定係女呢??

一家之「阿四」

fit_1109 — Fri, 16 Mar 2007 21:54:54 +0800

早幾日阿媽阿爸兩個去咗張家界第N次Honeymoon，遺留我、細妹同BeeBee三個可憐的小孤雛。

當知道佢地去旅行，我就嗱嗱聲同細妹夾好晒大家放工的時間，又即刻跟同事調更，務求是但其中一個可以留在屋企陪住BeeBee。為咗BeeBee大哥，真係大陣仗。

點知阿媽阿爸星期一朝早出發，我細妹下午就打俾我話佢發燒，攪到我放工就飛返屋企睇佢地。返到屋企就見到大果個就撻在梳化等待救援，而細果個餓到傻咗，一見我就不停撲來撲去問我攞野食。我連鞋都未換就馬上執行拯救行動，派糧食、發藥物、整理Bee哥的私人厠所、安排病人的膳食… 「阿四」的生涯就咁開始了…

第二日我細妹sick leave可以留在屋企，咁我就唔洗擔心BeeBee冇人陪(因為阿媽唔需要返工，日日可以在家陪BeeBee，只要全家人出晒街，BeeBee就會成日坐在門口等人返, 好鬼陰公)。點知我返到去，間屋好似打完仗咁，滿地都係BeeBee的玩具，咩事呀??? 原來Bee哥唔見咗阿媽兩日，發脾氣唔肯食野、唔肯痾尿… 我細妹用玩具氹佢，攪到成屋都係玩具… 我呢頭煮緊餸，果頭Beebee又叫我抱佢; 我哋開飯，BeeBee又走上嚟攞野食，我去開狗糧，佢又走開唔食… 食完飯叫細妹幫手洗碗，佢話唔舒服唔想郁，咁唯有自己去洗啦，擰轉背佢就嗱嗱聲去咗上網… 沖完涼見到阿媽上機前掠的衫仲未收，叫細妹幫手收衫，佢又立即扮死，又話冇力、講野又話冇氣!!!!

當晚攪到夜晚12點幾，Bee哥依然唔肯痾尿…佢唔痾唔緊要，我最怕佢賴尿。在地賴都仲好d, 在床或者梳化賴就真係「大檸樂」。 Bee哥，我抱你大，麻煩你快快趣痾完尿，大家就可以安心去瞓啦~~ 我咩方法都試過晒，最後我氹佢氹到口乾，諗住切個橙同BeeBee一齊食啦，點知BeeBee食食吓，突然雞咁腳衡入去佢個「私家厠」痾尿喎~ 真係謝而謝地… 終於可以瞓啦!!!

之後幾日我都係返夜更，每朝一起身，我就氹Bee哥食狗糧，氹佢痾屎痾尿… 佢永遠都要玩我，玩到我最後一分鐘出門口的時候，佢才慢條斯理地行去食狗糧。你係唔係玩野呀?? 返到公司，又成日提心吊膽，驚死佢發脾氣賴尿… 直到我細妹放工返到屋企檢查過確實冇賴尿跡象，我才鬆一口氣…

今日中午阿爸阿媽終於返嚟啦... 我的「阿四」生涯終於可以結束啦~ 點知下午阿媽打俾我﹕「一陣我同爸爸上大陸揼骨呀! 你放工早d返嚟睇住BeeBee呀!」 天呀!!!!

BeeBee恭喜大家發財

fit_1109 — Mon, 19 Feb 2007 20:36:06 +0800

BeeBee: 因為大姐姐年初二要開工，所以叫我代佢向大家拜年!

忙~ 忙~ 忙~

fit_1109 — Sun, 11 Feb 2007 10:15:21 +0800

今日終於有少少時間update一下個blog啦~

呢一個月公司忙到飛起，自己的私伙生意又忙，連續幾個星期晚晚都只瞓得3-4個鐘，連日日見面的同事都忍唔住講咗句:「嘩~ 你做咩咁殘呀!!!」

食住"情人節"條水，我的網上生意的確唔錯，而且仲超乎咗我的預算添~ 今次真係要多謝一下我的肥仔，如果冇佢幫我，我的生意一定唔會咁順利~ thank you 肥仔!!!

以下就係我第一批的完成品...

Wedding of Po & Sunny

fit_1109 — Sun, 31 Dec 2006 14:30:51 +0800

親愛的Po & Sunny,

百年好合永結同心

「三菲」上

Annual Dinner

fit_1109 — Sat, 23 Dec 2006 12:58:29 +0800

各位觀眾，「12月份我最難忘事件」的得獎者係...

公司Annual Dinner........ 的現金獎 -- HK$500

敬請原諒

fit_1109 — Mon, 20 Nov 2006 11:27:14 +0800

近日忙於打理網上業務，無暇更新網上日記。敬請原諒。

新婚快樂

fit_1109 — Tue, 14 Nov 2006 20:50:20 +0800

Kathy, 祝妳同Ray白頭到老、永結同心!

p.s 就係呢幅野令我頭痛咗3個星期!!! 估唔估到邊個係我呀?

開車呀!司機

fit_1109 — Fri, 03 Nov 2006 17:00:56 +0800

Bee: 司機，開車呀。唔該~
司機: 細路，去邊度呀?
Bee: 去拜山。
司機: 即係去邊度呀?
Bee: 唔知道呀!
司機: 咁你去拜邊個呀?
Bee: 我阿爺，即係你老豆。
司機: 哦~ 知道啦。不過細路係唔可以坐車頭架喎，你嗱嗱聲坐番去車尾啦! 百厭鬼!

無國界食點

fit_1109 — Mon, 30 Oct 2006 23:01:13 +0800

過咗中秋，天氣一轉涼，又到咗「燒雞翼」的最佳時候。近排有幾個朋友都打嚟問我燒烤場有咩好介紹，我生係屯門嘅人、死係屯門嘅鬼，問我有咩好介紹，仲洗問? 一定係龍鼓灘啦。點知呢位居住香港島的朋友截住我講:「如果係西貢、大埔仔、粉嶺、天水圍、龍鼓灘同小纜就唔洗多介紹嘞，我淨係想搵個近市區的地方姐。」想考我? 冇咁易!!!
正當呢個朋友想寸我冇料到，幫唔到佢之際，我即刻打斷佢:「你聽住... 九龍京士柏衛理道10號...菲律賓會無國界食點，每位$118任飲任食。問你死未? 」雖然我在電話見唔到我朋友個樣，不過我估到佢當時嘅反應一定係...

網址: http://www.m88.hk/food/bbq.html

瑜伽高手

fit_1109 — Fri, 06 Oct 2006 11:20:04 +0800

我細佬最近剪咗個skin head, 仲話學人玩瑜伽瘦身喎~